„უნდა ვიცოდეთ, რომ მთავარი ნაბიჯები, რაც გადაიდგა ევროპისკენ, ამისთვის მადლიერები ვართ რუმინეთის, რომელიც იყო საქართველოს პირველი მხარდამჭერი ჯერ ჩვენი დამოუკიდებლობის აღიარებით და შემდეგ ამ 30 წლის განმავლობაში მუდმივად მხარს გვიჭერდა ევროინტეგრაციისა და ევროატლანტიკური ინტეგრაციის გზაზე. ეს იყო ევროპაში ჩვენი მთავარი პარტნიორი. დღესაც რუმინეთი ჩვენი მთავარი მხარდამჭერია. უნდა ვიცოდეთ, რომ ის გადადგმული ნაბიჯი, ისტორიული ნაბიჯი, რასაც ჰქვია ევროპული პერსპექტივა, ნამდვილად არის უდიდესი ისტორიული ცვლილება ჩვენთვის. ჩვენი მხრივ, ყოველთვის გვქონდა მოთხოვნილება, ამბიცია, რომ გავმხდარიყავით ევროპული თანამეგობრობის ნაწილი. ეს იყო ჩვენი და არ იყო გაზიარებული ყველა ევროპული ქვეყნის მიერ. დღეს ეს უკვე გადალახული საზღვარია და ჩვენ ვართ მიღებული, აღიარებული, როგორც ამ ოჯახის წევრი, თუ არა ჯერ, როგორც ევროკავშირის სრული წევრი. ამისთვის ჩვენ უნდა გადავდგათ საჭირო ნაბიჯები. გვევალება, ვიმუშაოთ და ვაჩვენოთ ჩვენს ევროპელ პარტნიორებს, რომ არათუ პერსპექტივისთვის, არამედ წევრობისთვისაც მზად ვართ და ეს არის საქართველოს მოსახლეობის ნამდვილი, ძლიერი ნება.

ჩვენ ასევე უნდა ვიცოდეთ, რომ ეს პერსპექტივა არის შედეგი იმისა, რაც გააკეთა უკრაინამ, მისი მართლაც თავდადებული ბრძოლისა. არ იქნებოდა უკრაინა და დღეს ალბათ არ იქნებოდა მიღწეული ეს პერსპექტივა. მართალია, ჩვენ მეტი გვინდოდა, კანდიდატის სტატუსიც გვინდოდა, მაგრამ ამისთვის ჯერ გზა ხსნილია და შეგვიძლია, არ დავიშუროთ არანაირი ძალისხმევა, რათა სწრაფად მივაღწიოთ კანდიდატის სტატუსს. ეს არის ჩვენი უახლოესი მომავალი.

ასევე, ძალიან მნიშვნელოვანია და ამაში ძალიან დიდი როლი ითამაშა რუმინეთმა, რომ პრაღაში 6 ოქტომბერს ჩატარდა ევროპის პოლიტიკური გაერთიანება, რომელმაც ერთი მაგიდის ირგვლივ დასვა ყველა ქვეყანა, მათ შორის საქართველო, რომელთაც აქვთ ევროპული პერსპექტივა და ესეც ჩვენთვის ძალიან დიდი მიღწევაა. ამ ყველაფერში ჩვენი მთავარი პარტნიორი იყო, არის და იქნება რუმინეთი. დღეს რომ ხელი მოვაწერეთ სტრატეგიული პარტნიორობის დეკლარაციას, ესეც ერთ-ერთი დიდი ნაბიჯია, რადგან ამ განცხადებაში დევს ჩვენი ერთობლივი მომავალი, თანამშრომლობა, რაც ჩვენ გვაერთიანებდა აქამდე და რომელიც უნდა გაღრმავდეს, გაძლიერდეს ყველა მიმართულებით. იქნება ეს ეკონომიკური, კულტურული, იქნება სწორედ შავ ზღვაზე კონცენტრირებული, რომ ეს არის ზღვა, რომელიც რეალურად, საქართველის აერთიანებს ევროკავშირთან და ევროპასთან. ეს შავი ზღვა უნდა გახდეს ნამდვილი ხიდი, კი არ უნდა გვაშორებდეს, არამედ გვაახლოებდეს. ამიტომ უნდა იყოს დაძლეული ყველა საფრთხე, რომელიც ემუქრება დღეს შავი ზღვის სტაბილურობას. თუ არა სტაბილური, მშვიდობიანი შავი ზღვა, ჩვენ ვერ განვავითარებთ ყველა პროექტს, რაც არსებობს ევროკავშირის მხრიდან და რომელშიც მონაწილეობას იღებს, პირველ რიგში, რუმინეთი ჩვენთან ერთად. ჩვენ უნდა დავაახლოოთ ჩვენი პორტები, მოსახლეობა და გავხადოთ ფიზიკური კონტაქტები უფრო ადვილი, იქნება საზღვაო მიმოსვლებით, თუ პირდაპირი ფრენებით. ყველანაირი საშუალება უნდა გამოვიყენოთ, რათა ვიგრძნოთ, დავინახოთ, რომ ფიზიკურად ვართ ერთმანეთთან უფრო ახლოს და ეს კავშირები მეტად გავაძლიეროთ“, – განაცხადა სალომე ზურაბიშვილმა.