მისი თქმით, ავტოკრატიულ რეჟიმებში სატელეფონო საუბრების დროს ადამიანები ძალიან შეზღუდულნი არიან საკუთარი პოლიტიკური შეხედულებების დაფიქსირებაში.

"აქ ყველაზე მნიშვნელოვანია ფაქტორია ის, რომ ეს არის სატელეფონო კვლევა, რაც ადამიანებისთვის, ვინც იცნობენ კვლევების მეთოდოლოგიას, ძალიან საგულისხმო ფაქტორია ისეთ ქვეყანაში, როგორიც არის საქართველო, სადაც მოსახლეობის უდიდესი ნაწილი რეპრესიების მსხვერპლია და ოპოზიციურად განწყობილი ნაწილი ღიად და თავისუფლად საკუთარ პოლიტიკურ შეხედულებას ვერ აფიქსირებს. ამაზე მეტყველებს ის ფაქტიც, რომ თავად NDI- ის მონაცემებით, გამოპასუხების მაჩვენებელი არის 14 % ანუ დარეკილთაგან მხოლოდ 14 %-მა განაცხადა თანხმობა პასუხზე, რაც მეტყველებს ასევე იმაზე, რომ მოსახლეობის უდიდეს ნაწილს გამჟღავნების ეშინია.

მეთოდოლოგიას აქვს გარკვეული სპეციფიკა, ავტოკრატიულ ქვეყნებში განსაკუთრებით და ის, რომ ჩვენი ქვეყანა ავტოკრატიულად იმართება, ამას ამბობს მათ შორის, აშშ-ის სენატის საგარეო კომიტეტის ერთ-ერთი ყველაზე გავლენიანი წევრი ჯინ შაჰინი და არამხოლოდ და ავტოკრატიულ რეჟიმებში სატელეფონო საუბრების დროს ადამიანები ძალიან შეზღუდულნი არიან საკუთარი პოლიტიკური შეხედულებების დაფიქსირებაში. ამაზე მეტყველებს ეს კვლევა უპირველეს ყოვლისა," - განაცხადა ბოკუჩავამ.

ის ასევე გამოეხმაურა კვლევის კიდევ ერთ მიგნებას, რომლის თანახმად, ყოველი მეექვსე გამოკითხული ქვეყნიდან წასვლაზე ფიქრობს.

"ის, რომ ადამიანები ქვეყნიდან მასიურად გარბიან, მეტყველებს უპერსპექტივობაზე დღევანდელ მოცემულობაში. საარსებო მინიმუმის დაკმაყოფილების მიზნით ადამიანებს უწევთ ქვეყნიდან წასვლა, რაც პრინციპში დააანონსა ბიძინა ივანიშვილმა, როცა თქვა, რომ თუ არ მოგწონთ აქ, წადით, სხვაგან ეწიეთ ბედსო. მისი ქართული ოცნება სინამდვილეში არის ქართველებისგან დაცლილი საქართველო, სადაც მხოლოდ მისი მარიონეტები და კორუმპირებული კლანია," - განაცხადა ბოკუჩავამ.