მარკო რუბიოს არ უთქვამს, კონკრეტულად რა უნდა დათმოს, მაგალითად, უკრაინამ. სახელმწიფო მდივნის განცხადებით, პრეზიდენტ დონალდ ტრამპს სურს, ხელი შეუწყოს მშვიდობას და კონფლიქტები დაასრულოს, რაც მარტივი არ იქნება.

მარკო რუბიოს თქმით, უკრაინასთან კონფლიქტში რუსეთი აგრესორია, მაგრამ ეს ომი უნდა დასრულდეს. ტელეკომპანია CNN-ს მოჰყავს ახალი სახელმწიფო მდივნის სიტყვები, რომ ომის დასრულების კონკრეტულ დროს ვერ დაასახელებს, თუმცა, როცა ორ მხარეს შორის, რომლებიც თავის მაქსიმალურ მიზნებს ვერ აღწევენ, კონფლიქტის შეწყვეტაზეა საუბარი, თითოეულ მხარეს მოუწევს რაღაცაზე უარის თქმა.

რუბიომ ხაზი გაუსვა, რომ ომის დასრულება პრეზიდენტ ტრამპის მთავარი პრიორიტეტია, თუმცა საბოლოო გადაწყვეტილება უკრაინამ და რუსეთმა უნდა მიიღონ.

აშშ-ის 47-ე პრეზიდენტმა, რესპუბლიკელმა დონალდ ტრამპმა, რომლის ინაუგურაცია 20 იანვარს გაიმართა, ბოლო ხანს არაერთხელ განაცხადა, რომ მალე აპირებს შეხვედრას რუსეთის პრეზიდენტ ვლადიმირ პუტინთან.

ტრამპს მიზნად გამოცხადებული აქვს მოლაპარაკებების გზით უკრაინაში ომის რაც შეიძლება სწრაფად დასრულება.