რაც შეეხება ჩვენს ოპონენტებს, დიდ ყურადღებას არ ვაქცევ იმას, რასაც ისინი ამბობენ. ოპოზიცია მნიშვნელოვანია, როდესაც ის ჯანსაღია. თუმცა ჩვენს ქვეყანაში ოპოზიცია, რომელიც უნდა იყოს ქვეყნის პოლიტიკის წარმართვის ერთ-ერთი მთავარი ინსტიტუტი, ჯანსაღი არ არის,  – ამის შესახებ საქართველოს პრეზიდენტმა, მიხეილ ყაველაშვილმა, ფრანგულ Radio Courtoisie-თან ინტერვიუში განაცხადა.

მან ასევე ხაზი გაუსვა საქართველოს, როგორც უძველესი, მდიდარი ისტორიის მქონე ქვეყნის 3000-წლიან ისტორიას და 1700-წლიან ქრისტიანობას, ასევე ევროპელებთან არსებულ ბევრ საერთო მახასიათებელს.
„ეს კითხვა მოითხოვს რამდენიმე პასუხს. მე მინდა ვფოკუსირდე ძირითად საკითხებზე: ობიექტური დამოკიდებულება რომ გვქონდეს, კითხვის ნიშნები არ უნდა იყოს. შვეიცარიაში ყოფნის დროს, შევნიშნე პარტიული დამოკიდებულება კომუნიკაციის პროფესიონალების მხრიდან სააკაშვილის ეპოქაში, როდესაც მედია გაშუქება ძალიან განსხვავდებოდა რეალობისგან. და სწორედ ეს მედია პროფესიონალები არიან, რომლებიც ამჟამად ხელმძღვანელობენ პრესაში ინფორმაციის წარმოებას. მაგრამ რადგან წლები გავატარე ევროპაში, მინდა ვთქვა, რას წარმოადგენს ევროპა საქართველოსთვის. 3000-წლიანი ისტორიით და 1700-წლიანი ქრისტიანობით ჩვენ უძველესი ქვეყანა ვართ მდიდარი ისტორიით. ის, რაც გვაერთიანებს და გვამსგავსებს ევროპას, არის ქრისტიანული ღირებულებები. ჩვენ ბევრი რამ გვაქვს საერთო ევროპელებთან: ჩვენი ხასიათი, ჩვენი იდენტობა, ჩვენი ღირებულებები, მიუხედავად ჩვენი გეოგრაფიული დაშორებისა. ეს მსგავსებებია, რომლებიც ჩვენ გვიზიდავს ევროპისკენ. მაგრამ ვფიქრობთ, რომ ჩვენ პირველ რიგში ქართველები ვართ, შემდეგ კი – ევროპელები.“ –  განაცხადა პრეზიდენტმა.