არ ვიცი, რა თქვა მაკრონმა, მან ვაშინგტონში თავისი როლი დამაჯერებლად ითამაშა, მაგრამ ტრამპმა თქვა, როგორც ეს მე წავიკითხე, რომ სამშვიდობოების განთავსების შესახებ გადაწყვეტილების მიღება ორივე მხარის თანხმობით უნდა მოხდეს და როგორც ჩანს, ჩვენ და უკრაინას გულისხმობდა. ამის შესახებ ჩვენთვის არავის უკითხავს. იყო იდეები, მაგალითად,”მოდით, დავტოვოთ საკონტაქტო ხაზი - ეს რუსული იყოს, ეს კი უკრაინული”. პირველ რიგში, ეს არ მოხდება, რადგან ჩვენ კონსტიტუცია გვაქვს, რომელიც ხალხის ნებას გამოხატავს და მეორეც, რაც უკრაინისგან რჩება, რასისტული კანონებისგან ისიც უნდა გათავისუფლდეს”, - აღნიშნა ლავროვმა”, - წერს გაზეთი “რეზონანსი” სტატიაში, სათაურით არც სამშვიდობოები და არც ფრონტის ხაზის “გაყინვა” - მოსკოვი უკრაინაში ევროპული კონტინგენტის განთავსების წინააღმდეგია.

“აღსანიშნავია ისიც, რომ კრემლის პრესსპიკერის, დიმიტრი პესკოვის განცხადებით, ვლადიმერ პუტინსა და დონალდ ტრამპს შორის მორიგი სატელეფონო საუბარი ჯერჯერობით არ იგეგმება. “საჭიროების შემთხვევაში საუბარი ყოველთვის შეიძლება შედგეს. დიალოგი განახლებულია. ჯერჯერობით ასეთი გეგმები არ არსებობს, მაგრამ ეს გეგმები შეიძლება სწრაფად შეიცვალოს”, - განაცხადა დიმიტრი პესკოვმა. პესკოვმა რუსეთისა და აშშ-ის პრეზიდენტების, ვლადიმერ პუტინისა და დონალდ ტრამპის სავარაუდო შეხვედრის შესახებ დასმულ შეკითხვას უპასუხა. “არსებობს გაგება, რომ შეხვედრა უნდა შედგეს, მაგრამ იგი კარგად უნდა იყოს მომზადებული”, - თქვა მან. საქართველოს სტრატეგიული ანალიზის ცენტრის გეოპოლიტიკური კვლევების ხელმძღვანელის ვახტანგ მაისიას განცხადებით, ამ ეტაპზე სამშვიდობო მისიებზე საუბარი ზედმეტია. როგორც მან განაცხადა, სრულიად გასაგებია, რომ რუსებს ევროპელების ამ მხრივაც ჩართვა არ აწყობთ”, - აღნიშნავს გამოცემა.

“სამშვიდოების განთავსება უნდა გადაწყდეს მაშინ, როცა მომზადდება მოლაპარაკებების შესახებ ზავის შეთანხმება. უნდა გაიმართოს მოლაპარაკებები, როგორც თავის დროზე იყო ნორმადიის ფორმატი, სადაც მონაწილეობდა გერმანია, საფრანგეთი და უკრაინა. ამას ზოგადად ვამბობ, შეიძლება ამერიკელებმაც მიიღონ მონაწილეობა. ამ მოლაპარაკების მიხედვით, მხარეები უნდა შეთანხმდნენ, დროებით ცეცხლის შეწყვეტის შესახებ შეთანხმების გამყარების მიზნით, სამშვიდობოები ჩააყენონ თუ არა, სად განთავსდება, რომელი ქვეყნის სამშვიდობოები იქნებიან და ა.შ. ეს ყველაფერი მოლაპარაკების შედეგად უნდა გადაწყდეს. როგორც ჩანს, რუსები წინააღმდეგეები არიან, რომ ევროპელებმა მიიღონ მონაწილეობა, თუნდაც სამშვიდობო მისიის განხორციელებაში. ეს გასაგებიც არის, რადგან მათ არ აწყობთ ევროპელების ამგვარი ჩართულობაც კი. ჯერჯერობით ეს ყველაფერი ინიციატივის დონეზეა და არაფერი რეალური”, - აცხადებს გამოცემის კორესპონდენტთან საუბრისას ვახტანგ მაისაია.