საგარეო საქმეთა მინისტრმა აღნიშნა, რომ საქართველოში არსებობენ პოლიტიკოსები, რომლებიც ღიად მოქმედებენ უცხოელი ბიუროკრატებისა თუ პოლიტიკოსების ინსტრუქციებით და ცდილობენ ქვეყნის შიდა პოლიტიკა ამ მიმართულებით წარმართონ.

“ასეთი პოლიტიკოსების ჯგუფი რომ არსებობს საქართველოში, ამაში ორი აზრი არ არსებობს და უკვე თავად ამტკიცებენ – უყურებენ თუ რა ინსტრუქციას გასცემს რომელიმე ბიუროკრატი, თუ უცხოელი პოლიტიკოსი და ამას უნდა მიჰყვნენ და ამას უნდა მიჰყვეს ქართული პოლიტიკური პროცესიც. ეს, რა თქმა უნდა, პირველ რიგში მიმართულია საქართველოს ეროვნული ინტერესების დასაზიანებლად და ამის უკან არ დგას კეთილი განზრახვა.”- განაცხადა მაკა ბოჭორიშვილმა.

მინისტრმა ისაუბრა საერთაშორისო პარტნიორების დამოკიდებულებაზე სასამართლოსა და პოლიტიკური ინსტიტუტების მიმართ და შეეხო უცხოელი პარტნიორების მხრიდან გაკეთებულ ზოგიერთ განცხადებას. მისი თქმით, ასეთი მიდგომა არ შეესაბამება იმ ევროპულ ფასეულობებს, როგორიცაა კანონის უზენაესობა და თანასწორობა კანონის წინაშე.

“ძალიან რთულია სამართლებრივი გამართლება მოუძებნო ამ განცხადებებს და ზოგადად, გაამართლო რამენაირად მოსამართლის დასჯის მოწოდებები, რომ მოსამართლეს დაუწესო სანქცია ან სასამართლოზე ამგვარად მოახდინო გავლენა და შემდგომ გამოხვიდე და ისაუბრო სასამართლოს დამოუკიდებლობაზე და ლექციები წაიკითხო იმაზე, როგორ უნდა იყოს სამართალი უზენაესი და კანონის წინაშე უნდა იყოს ყველა თანასწორი, მაშინ, როდესაც ამართლებ კანონის დამრღვევებს, ითხოვ ამ კანონის დარღვევისთვის მიღებული გადაწყვეტილების მიმღები მოსამართლის დასჯას და სანქციების დაწესებას, ალოგიკურია ეს ყველაფერი.

არანაირად არ ჯდება არანაირ ევროპულ ფასეულობებში”- აღნიშნა მინისტრმა.

მაკა ბოჭორიშვილმა განაცხადა, რომ მნიშვნელოვანია განვსაზღვროთ, თუ როგორ სახელმწიფოში გვინდა ცხოვრება. მისი თქმით, ქვეყანაში პოლიტიკური და სამართლებრივი პროცესები უნდა ვითარდებოდეს მხოლოდ ეროვნულ ინტერესებზე დაყრდნობით და არა გარედან წამოსული მითითებებით:

“არ შეიძლება მუდმივად ასე ვიაროთ – რომ ვიღაც გიკარნახებს, ვინ უნდა დაიჭირო, ვინ არ უნდა დაიჭირო, ვინ უნდა იყოს პასუხისგებაში მიცემული და ვინ არა. არ შეიძლება არსებობდეს ხელშეუხებელი ადამიანების სია, რომელთაც რაც უნდათ, ის შეუძლიათ გააკეთონ, ეს მადა კიდევ უფრო გაძლიერდა და ყოველდღიურად ვხედავთ, რომ შენი სახელმწიფოებრიობა, შენი კონსტიტუცია, შენი კანონმდებლობა, დემონსტრაციულად ხდება ამ ყველაფრის შეურაცხყოფა და გათელვა, და ასეთი სახელმწიფო გვინდა ჩვენ შვილებისთვის? სადაც პოლიტიკოსი გამოვა, შეურაცხყოფს სახელმწიფოს კონსტიტუციას, კანონს, სახელმწიფო ინსტიტუტებს და შემდგომ აქვს პრეტენზია იმაზე, რომ იყოს პოლიტიკაში და იყოს ხელისუფლებაში, ასეთ სახელმწიფოში ცხოვრება არ ვიცი რამდენად სასიამოვნო და სასურველია.” – განაცხადა საგარეო უწყების ხელმძღვანელმა.