მისივე თქმით, ხალხი ხედავს, რომ არის მცირე ექსტრემისტების ჯგუფი, რომლებიც ღამე დაიარებიან და ძალადობენ.

„კვლევას რომ თავი დავანებოთ, ესეც ხომ აჩვენებს, რომ არათუ მხარდამჭერები ჰყავთ ნაკლები, ვერ პოულობენ ადამიანს, რომელიც წავა ამ ნაბიჯზე, რომ გახარიას და „ლელოს“ პარტიის სახე იყვნენ. რატომ? იმიტომ, რომ ერთი მხრივ, გვაქვს „ლელოსთან“ საქმე, რომელიც არის თაღლითობის მიზნით შექმნილი ორგანიზაცია. იცით, თავად ხაზარაძემ აღიარა, რომ ანაკლიის საქმის გამო შექმნა ეს პარტია და მოვიდა პოლიტიკაში. დღეს ყველამ ვიცით დადასტურებით, ყველა ინსტანციით და ყველა საერთაშორისო არბიტრაჟით, რომ ეს იყო თაღლითობა, რასაც ისინი აპირებდნენ ანაკლიაში და როგორ აპირებდნენ, რომ საქართველოს ბიუჯეტის თითქმის 15 პროცენტი ჯიბეში ჩაედოთ. ამ მიზნისთვის, რომ საქართველოს ბიუჯეტის 15 პროცენტამდე ჯიბეში ჩაედოთ, შექმნეს თაღლითური პარტია „ლელო“.

მეორე, გახარია, რომელიც დაფუძნებულია სრულიად ღალატზე. ეს ადამიანი არის ქრონიკული მოღალატე. ჯერ „ქართულ ოცნებასთან“ დაკავშირებით, გახსოვთ თქვენ, რომ უცხო ქვეყნის ელჩთან შეთანხმებით გაიქცა, ახლა თავის პარტიასაც გაექცა და არის უცხო ქვეყნის რეზიდენტი. შესაბამისად, რეიტინგებშიც ეს ყველაფერი არის ასახული. ხალხი ამას ხედავს. ხედავს, რომ არის მცირე ექსტრემისტების ჯგუფი, რომლებიც ღამე დაიარებიან და ძალადობენ. იმიტომაც ძალადობენ, რომ ისინი თავად ხვდებიან, ცოტანი არიან და ექსტრემისტები არიან. ასე, რომ ეს ყველაფერი აისახება რეიტინგებშიც და რაც მთავარია, 4 ოქტომბერს ყველა დაინახავს ამას“, – აღნიშნა შალვა პაპუაშვილმა.