4 სცენის გამართვის აუცილებლობას ბურჭულაძე შეკრებაში მონაწილეობის მსურველთა დიდი რაოდენობით ხსნის. მეორეს მხრივ კი, ეს შეიძლება საპოლიციო ძალების დაქსაქსვის მიზნით კეთდებოდეს. ანალიტიკოსი ნიკა ჩიტაძე მიიჩნევს, რომ აქციის ორგანიზატორებს, ბევრი ხალხის შემთხვევაში, 4 სცენა შეიძლება აქციის მონაწილეთა უკეთ კოორდინაციისთვის გამოეყენებინათ და მეორეს მხრივ, “პოლიცია იძულებული იქნებოდა, რომ ოთხ სხვადასხვა ლოკაციაზე დამდგარიყო”. მერიამ ბურჭულაძის განცხადებაც გაასაჯაროვა და მისი პასუხიც. ამ მონაცემებიდან ჩანს, რომ განცხადება მერიაში 29 სექტემბერს შევიდა”, - წერს გაზეთი “რეზონანსი” სტატიაში, სათაურით 4 ოქტომბერი, 4 საათი და 4 სცენა - ოპოზიციის გეგმის ახალი დეტალები.

“აპარატურის და სცენების მონტაჟი მოთხოვნილია შემდეგ ლოკაციებზე: 1. თავისუფლების მოედანი (საკრებულოს შენობის წინ); 2. პარლამენტის შენობის წინ; 3. ფალიაშვილის სახელობის ოპერისა და ბალეტის თეატრის წინ; 4. რესპუბლიკის მოედანზე. მანამდე ბურჭულაძისგან ცნობილი იყო, რომ აქცია 4 საათზე დაიწყება, ხალხის ჩამოყვანა რეგიონებიდანაც იგეგმება და ორგანიზატორებს დაახლოებით 200-300 ათასი კაცის მოლოდინი აქვთ. მისივე თქმით, ეს იქნება არა უბრალოდ აქცია-პროტესტი, არამედ “ეროვნული კრება”, რომლის თავმჯდომარე თავად იქნება და ხალხი “ხელის აწევით” გამოხატავს თანხმობას ხელისუფლების გადაბარებაზე, რის მერეც საჯაროდ დასახელდება ე.წ. ტექნიკური მთავრობის შემადგენლობა და საღამოს 8 სათისთვის “ხელისუფლების გადაბარება უკვე დასრულებული იქნება”, - აღნიშნავს გამოცემა.

“განმცხადებელი ითხოვს, 4 ოქტომბერს, რუსთაველის გამზირსა და თავისუფლების მოედანზე არსებულ ოთხ ლოკაციაზე სახალხო შეკრებისა და სცენის მონტაჟისთვის, მუნიციპალური და სახელმწიფო უწყებების ინფორმირებას და აღნიშნული ტერიტორიების შესაბამისი ინვენტარით უზრუნველყოფას. განმცხადებელს პასუხად ეცნობა, რომ შეკრების ორგანიზატორებმა სცენა უნდა განათავსონ მხოლოდ ერთ ლოკაციაზე იმგვარად, რომ არ შეფერხდეს ტრანსპორტის გადაადგილება და ხელი არ შეეშალოს ტერიტორიაზე არსებული სხვადასხვა ობიექტის ფუნქციონირებას”, - წერია მერიის განცხადებაში. გარდა ამისა, მერია მიუთითებს, რომ, კანონმდებლობის შესაბამისად, “დაუშვებელია კენჭისყრის დღეს კენჭისყრის შენობაში ან კენჭისყრის შენობიდან 100 მეტრის მანძილზე ამომრჩევლის გადაადგილების ფიზიკურად შეფერხება. ასევე, დაუშვებელია კენჭისყრის დღეს კენჭისყრის შენობიდან 100 მეტრის მანძილზე ადამიანთა შეკრება”, - განაგრძობს გამოცემა.

“საპასუხოდ ბურჭულაძე ამბობს, რომ “ვალდებულები არ იყვნენ, რომ ნებართვა მოეთხოვათ”. “ეს არის უმნიშვნელოვანესი კრება. ნუ გეშინიათ, ჩვენ მშვიდობიანად მოვდივართ, კანონს არ დავარღვევთ, ოღონდ გაფრთხილებთ - თქვენც არ დაარღვიოთ კანონი და მოიქეცით კანონის ფარგლებში”, - თქვა ბურჭულაძემ მერიის მიერ მიმოწერის გასაჯაროების შემდეგ. კითხვაზე, რა საჭიროა ოთხი სცენა სხვადასხვა ლოკაციაზე, შავი ზღვის საერთაშორისო უნივერსიტეტის პროფესორი ნიკა ჩიტაძე ამბობს, რომ ერთი მხრივ შესაძლოა ოთხივე სცენაზე განცხადებები გაკეთებულიყო ორატორებისგან, რადგან როდესაც ძალიან ბევრი ადამიანი იკრიბება, ვინც ოპერასთან დგას, შესაძლოა პარლამენტის წინ მდგარი სცენიდან ვერ გაიგოს და მეორეს მხრივ, არაა გამორიცხული, რომ მიზანი პოლიციის დეკონცენტრაცია ყოფილიყო”, - დასძენს გამოცემა.

“ვფიქრობ, ძალიან ბევრ ადამიანს ელოდებიან და ურთიერთკოორდინაცია რომ იყოს. შესაძლებელია მონიტორებიც დაემონტაჟებინათ და ამით ოთხი სხვადასხვა ადგილიდან ურთიერთკოორდინაცია ყოფილიყო. ამასთან, არ გამოვრიცხავ, პოლიციის კონცენტრაცია მომხდარიყო ოთხ სხვადასხვა ადგილას. გვახსოვს, როდესაც სპეცდანიშნულების რაზმი ხალხს არბევდა, ძირითადად განთავსებული იყვნენ თავისუფლების მოედნის მიმდებარედ და შემდგომში იწყებდნენ წყლის ჭავლისა და მხუთავი აირის გამოყენებას. ახლა პოლიცია იძულებული იქნებოდა, რომ ოთხ სხვადასხვა ლოკაციაზე დამდგარიყო. ერთი სცენით, ვფიქრობ, კოორდინაცია მაინც იქნება. შესაძლოა პოლიციასთან გარკვეული პრობლემები შეიქმნას, მაგრამ სცენების გარეშე შესაძლოა მონიტორიც დამონტაჟდეს. მგონია, რომ ბევრი ადამიანი იქნება დაწყებული რესპუბლიკის მოედნიდან. რეგიონებში ხალხთან შეხვედრები შედგა”, - დაასკვნის გამოცემის კორესპონდენტთან საუბრისას ნიკა ჩიტაძე.