პრეზიდენტმა მოსკოვის აღმოსავლეთ ოლქში შინაგან საქმეთა სამმართველოს ხელმძღვანელი, ანდრეი პუჩკოვი და შსს-ს მოსკოვის მთავარი სამმართველოს ნარკოტიკებთან ბრძოლის სააგენტოს ხელმძღვანელი იური დევიატკინა გაათავისუფლა. გარდა ამისა, სამსახურს ჩამოაშორეს პოლიციელები, რომლებმაც გოლუნოვი დააკავეს.

გამომძიებელი ჟურნალისტი ივან გოლუნოვი ნარკოდანაშაულის ბრალდებით მოსკოვში 6 ივნისს დააკავეს. პოლიციაში აცხადებდნენ, რომ ჩხრეკის დროს გოლუნოვის ზურგჩანთიდან მეფედრონის ხუთი პაკეტი ამოიღეს, ხოლო სახლის ჩხრეკისას კოკაინი და ელექტრონული საათი იპოვეს. პოლიციამ სახლის ჩხრეკის ცხრა ფოტო გაასაჯაროვა, თუმცა შემდგომში აღმოჩნდა, რომ გავრცელებული ფოტოებიდან მხოლოდ ერთი იყო გოლუნოვის სახლში გადაღებული. შეცდომა აღიარეს პოლიციაშიც. 9 ივნისს სასამართლომ ჟურნალისტს აღმკვეთ ღონისძიებად შინაპატიმრობა შეუფარდა.

ივან გოლუნოვი ამბობს, რომ ის მისი საქმიანობის და ბოლო გამოძიების გამო დააკავეს, რომელიც დამკრძალავი ბიუროების ბიზნესს ეხებოდა. მისივე თქმით, მას რამდენჯერმე ემუქრებოდნენ.

ჟურნალისტის დაკავებას ქვეყნის მასშტაბით დიდი საზოგადოებრივი პროტესტი მოჰყვა. გოლუნოვის გათავისუფლებასა და საქმის სწორად გამოძიებას ითხოვდნენ როგორც ჟურნალისტები, ისე კულტურის სფეროს წარმომადგენლები და პოლიტიკოსები. მხარდასაჭერი საპროტესტო აქციები გაიმართა როგორც ქვეყნის შიგნით, ისე მის ფარგლებს გარეთ.

საბოლოოდ კი, გოლუნოვის წინააღმდეგ სისხლისსამართლებრივი დევნა 11 ივნისს შეწყდა. საქმე ბრალის დაუმტკიცებლობის გამო შეწყდა.

გოლუნოვის მხარდასაჭერად 12 ივნისს მოსკოვში საპროტესტო მარში მოეწყო. აქცია მოსკოვის მერიასთან შეთანხმებული. სამართალდამცავებმა მოქალაქეების წინააღმდეგ ხელკეტი და წყალი გამოიყენეს. საპროტესტო აქციის 400-ზე მეტი მონაწილე დააკავეს.

on.ge