“ივანიშვილმა მოატყუა ყველა, ვისი მოტყუებაც შეიძლებოდა. უკიდურესი შეურაცხყოფა მიაყენა მათ, ვინც წლების განმავლობაში ერთგულად ემსახურებოდა. ფაქტობრივად, დაიშალა საპარლამენტო უმრავლესობა, გადადგა საგარეო ურთიერთობის სამი კომიტეტის თავმჯდომარე და ვიცე-სპიკერიც. ბიძინა ივანიშვილმა ეს ყველაფერი დაგეგმა თავისი ყურმოჭრილი მსახურების, მაგალითად, “ქართუში” მომუშავე ვინმე დაჩი ბერაიასა და თავისი პირადი ექიმის, დიმიტრი ხუნდაძის დახმარებით”, - აცხადებს “ნაციონალური მოძრაობის” წევრი რომან გოცირიძე გაზეთ “კვირის პალიტრისთვის” მიცემულ ინტერვიუში, სათაურით “ახლა “ოცნება” თავისი ინტელექტუალური შემადგენლობით სოფლის საკრებულოს დაემსგავსა” / “ყველა ერთის წინააღმდეგ _ ასე გადაწყდა პარტიების გაერთიანებულ შეკრებაზე”.
"გადაჭარბებული მგონია შეფასება, რომ რაც მოხდა, რუსული პროექტია - ჩემი აზრით, ფიქრობენ, რომ ეს “ქართულ ოცნებას” ხელისუფლებაში დარჩენაში შეუწყობს ხელს, რაშიც ცდებიან. ისე დაეცა “ქართული ოცნების” რეიტინგი, რომ ამ პროცესებს უფრო საღად შევხედავდი. როგორი საარჩევნო სისტემითაც უნდა ჩატარდეს არჩევნები, მმართველ გუნდს ძალიან გაუჭირდება. მეტიც - დღეს რომ ჩატარდეს არჩევნები, ვფიქრობ, მწარედ დამარცხდებიან. ეს ცუდია, რადგან შეიძლება “ნაციონალური მოძრაობა” შემოგვიბრუნდეს, რასაც აუცილებლად მოჰყვება რევანშის ძლიერი ტალღა”, - აცხადებს ექსპერტი სანდრო თვალჭრელიძე გაზეთ “კვირის პალიტრისთვის” მიცემულ ინტერვიუში, სათაურით “მაჟორიტართა აჯანყებამ” რუსულ წისქვილზე დაასხა წყალი” / “უკვე ვეღარ გამოვრიცხავთ, რომ ეს უმრავლესობა მთლად დაიშალოს და ახალი უმრავლესობა შეიქმნას. არ ვიცი, ესმით თუ არა “ქართულ ოცნებაში”, რომ სასწრაფოდ არის ზომები მისაღები”.
მაჟორიტარული სისტემა უფრო მეტად შეესაბამება საქართველოს ისტორიულ მოწყობას,- ამის შესახებ პრემიერ-მინისტრის მრჩეველმა სოზარ სუბარმა „ქართული ოცნების“ ოფისში ჟურნალისტებთან განაცხადა.
პარლამენტის თავმჯდომარემ, არჩილ თალაკვაძემ ბიუროს სხდომაზე ის ბოქლომი და ჯაჭვი მიიტანა, რომელიც პარლამენტის ჭიშკარზე აქციის მონაწილეებმა დაკიდეს.
საპარლამენტო უმრავლესობის წარმომადგენელი რომან კაკულია აცხადებს, რომ ახლა ხელისუფლების მთავარი მოვალეობაა, კონცენტრირდეს მხოლოდ იმ მოთხოვნებზე, რაც ოპოზიციამ დააყენა.
საუკუნეების განმავლობაში ჩვენი ისტორია გვკარნახობს, რომ ქართველი ხალხი არასოდეს ყოფილა მონობისთვის გაჩენილი. არამგონია, ქართველმა ხალხმა ამდენ ტყუილს გაუძლოს, - ამის შესახებ ექს-პრეზიდენტის, გიორგი მარგველაშვილის მეუღლემ, მაკა ჩიჩუამ პარლამენტთან განაცხადა, სადაც ვადამდელი პროპორციული არჩევნების მოთხოვნით მიმდინარე საპროტესტო აქციას შეუერთდა.
