როგორც გაბუნიამ განმარტა, საბჭოს გადაწყვეტილებით, ეთიკური პრაქტიკის სერიოზული დარღვევები გამოვლინდა, რის გამოც სათანადო რეაგირების აუცილებლობის შესახებ რეკომენდაცია გაიცა.

„ახალციხის კლინიკა „იმედში“ მომხდარი ტრაგიკული შემთხვევა, რომელიც უკავშირდება ჩვენი კოლეგა, მეგი ბაქრაძის გარდაცვალებას, რაც ვაქცინაციის პროგრამის პირველივე კვირას მოხდა, ამ შემთხვევასთან დაკავშირებით, ჯერ კიდევ ექსპერტიზა გრძელდება. გასულ კვირას გაიმართა პროფესიული საბჭო, რომელმაც იმსჯელა იმ გამოვლენილ პროცედურულ დარვევებზე, რომელიც იქ დაფიქსირდა, გამოძიებამ ამის შესახებ საზოგადოებას დიდი ხნის წინ აცნობა. პროფესიული საბჭოს რეკომენდაცია ახალციხის კლინიკის მიმართ იყო იმგვარი, რომ ეთიკური მხარე, ასევე პროცედურული და საქმის წარმოების მხარე დაირღვა ამ შემთვევაში, რაც მნიშვნელოვანია, რომ რეაგირების გარეშე არ დარჩეს. რა თქმა უნდა, პროფესიული საბჭოს უფლებამოსილებას ცილდება რომელიმე თანამშრომლის დანიშვნა, ან გათავისუფლება, თუმცა, აქცენტი გაკეთდა ეთიკური პრაქტიკის სერიოზულ დარღვევაზე და საბჭომ გასცა რეკომენდაცია სათანადო რეაგირების აუცილებლობის შესახებ. როგორც ჩანს, ეს იყო რეაგირება განხორციელებული ახალციხის კლინიკის მიმართ დროებით, ვიდრე არ დადგინდება საბოლოოდ მიზეზები. საბოლოო მიზეზების დადგენის შემდეგ საბჭო კიდევ იმსჯელებს პროფესიული პასუხისმგებლობის დადგომის შესახებ, თუმცა ჯერჯერობით, დაისვა არაეთიკური და პროცედურული დარღვევების თემა... რა პირობებით მოხდა გათავისუფლება, ეს არის დროებითი ხელშეკრულების შეჩერება, თუ რაიმე სხვა პირობა, ამასთან დაკავშირებით, დაზუსტებული ინფორმაცია არ მაქვს, თუმცა საბჭოს რეკომენდაცია ეს ნამდვილად იყო“, - განაცხადა გაბუნიამ.

კითხვაზე, თუ რამდენი თანამშრომელი გათავისუფლდა კლინიკიდან, გაბუნიამ განაცხადა, რომ საუბარია ორ თანამშრომელზე.

„ამ შემთხვევაში იყო საუბარი იმ ექიმებზე, ვინც იყო ჩართული პროცესში, შეიძლება, ორი, ან სამი კოლეგა, ნაწილი იქ აღარ მუშაობდა. ამდენად, ის ვინც იქ დარჩა, ამათთან მიმართებაში არაეთიკურად ჩაითვალა საკითხი. მიუხედავად ასეთი ტიპის პროცედურული გადაცდომებისა, კოლეგები აგრძელებდნენ მუშაობას იგივე დაწესებულებაში რეაგირების გარეშე, ვფიქრობ, ორი შემთხვევა იყო ასეთი“, - განაცხადა გაბუნიამ.