„ჩემპიონთა ლიგის მოგებისთვის [ხვიჩა კვარაცხელია] გვინდა წარვადგინოთ წმინდა გიორგის სახელობის გამარჯვების ორდენზე“, - განაცხადა „ქართული ოცნების“ მთავრობის მეთაურმა ირაკლი კობახიძემ დღეს, 3 ივნისს, მთავრობის სხდომაზე.

მისი თქმით, „პრეზიდენტი [მიხეილ ყაველაშვილი] მას დააჯილდოებს უმაღლესი სახელმწიფო ჯილდოთი, წმინდა გიორგის სახელობის გამარჯვების ორდენით“.

ირაკლი კობახიძემ ასევე განაცხადა, რომ საქართველოს ჰყავს კიდევ ორი სპორტსმენი - კახა კალაძე და ზაზა ფაჩულია, - რომელთაც „უმაღლეს საკლუბო ტურნირებში აქვთ მიღებული უმაღლესი ჯილდო“.

„მათ არ აქვთ მიღებული ანალოგიური ჯილდოები. ვფიქრობ, დაგვიანებით, მაგრამ მათი ეს წარმატება უნდა დავაფასოთ“, - განაცხადა მან.

წმინდა გიორგის სახელობის გამარჯვების ორდენი ადამიანს ენიჭება საქართველოსთვის მოპოვებულ გამარჯვებებში შეტანილი განსაკუთრებული წვლილისათვის.

ორდენი 2004 წელს შემოიღეს, პირველი ორდენი შეერთებული შტატების 43-ე პრეზიდენტს, ჯორჯ ბუშს (უმცროსს), 2005 წლის 10 მაისს გადასცა მაშინდელმა პრეზიდენტმა მიხეილ სააკაშვილმა.