მედიასაშუალებები დაღუპულთა სახელებს და გვარებს მოხალისეთა ჯგუფებთან ერთად ადგენენ საფლავების შესწავლის და საჯარო წყაროებით გავრცელებული ცნობების გადამოწმებისა და შედარების საფუძველზე.

დაღუპულთა გვარებს საჯარო სივრცეში, მაგალითად, სოციალურ ქსელებში ყველაზე ხშირად ასახელებენ რუსეთის რეგიონებისა და რაიონული ადმინისტრაციების ხელმძღვანელები, ადგილობრივი მედია, სასწავლო დაწესებულებები, სადაც ეს მეომრები სწავლობდნენ და დაღუპულთა ოჯახის წევრები და ნათესავები.

პროექტის ფარგლებში განახლებული მონაცემები დღეს, 24 თებერვალს, ომის დაწყების მეოთხე წლისთავზე გამოქვეყნდა.

• გასულ ერთ თვეში სია 35 ათასი დაღუპულის სახელით შეივსო.
• 2026 წლის 24 თებერვლის მდგომარეობით, დადგენილია 2025 წლის განმავლობაში დაღუპული 49 935 მეომრის ვინაობა. უმრავლესობა მოხალისე იყო.
• 2025 წელს გამოქვეყნებული ნეკროლოგების რაოდენობა 40%-ით აღემატებოდა 2024 წლის მაჩვენებელს.

კვლევა აჩვენებს, რომ რუსეთის ოლქების მიხედვით, დანაკარგი ყველაზე დიდია ღარიბ რეგიონებში და რაც უფრო ღარიბია რეგიონი, მით უფრო მაღალია დაღუპულთა რიცხვი.

მაგალითად, რუსეთის მასშტაბით დაღუპულთა რიცხვი ყველაზე დაბალი მოსკოვშია - 5 ყოველ 10 ათას მამაკაცზე, ეკონომიკური კეთილდღეობის დაბალი მაჩვენებლის მქონე ბურიატიის რესპუბლიკაში - 27, ხოლო ტუვაში - 33.