როგორც კრემლის პრესსპიკერმა, დიმიტრი პესკოვმა ჟურნალისტებთან აღნიშნა, მოსკოვი არ გამორიცხავს უმაღლეს დონეზე კონტაქტს, თუმცა შეხვედრა შეიძლება შედგეს მხოლოდ მას შემდეგ თუ მხარეები მიაღწევენ კონკრეტულ შეთანხმებებს.

„თავად შეხვედრა არ უნდა გახდეს მოლაპარაკებების დასაწყისი – ის შეიძლება გახდეს მხოლოდ მოლაპარაკებების შედეგი“, – განაცხადა პესკოვმა.

მისი თქმით, დიალოგის დაწყება რეალურია იმ შემთხვევაში, თუ წინასწარ განხორციელდება საფუძვლიანი სამუშაო დიპლომატებისა და სამხედრო ექსპერტების მონაწილეობით.

როგორც მედია იუწყება, რუსეთის მხრიდან განცხადება გაკეთდა იმ ფონზე, როდესაც დასავლეთი – განსაკუთრებით კი შეერთებული შტატები – აქტიურად მოუწოდებს მხარეებს კონფლიქტის დეესკალაციისკენ.

მედიის ცნობით, ვაშინგტონი ცდილობს, მხარეებს შორის შეთანხმება აგვისტოს პირველ ნახევარში მოახერხონ, წინააღმდეგ შემთხვევაში მოსკოვს, შესაძლოა, ახალი სანქციები დაუწესდეს.