თეა წულუკიანის განცხადებით, „ნაციონალური მოძრაობის“ რეჟიმის მიერ სასჯელაღსრულების სისტემაში მიმდინარეობდა „პატიმრების შენიღბული და მიზანმიმართული განადგურება“.

„დაკავებულ პირთა და პატიმართა მიმართ წამება და არაადამიანური მოპყრობა იგულისხმება შსს-ს სისტემასა და სასჯელაღსრულების სისტემაში მოპყრობა, რომელიც გამოიყენებოდა ცალკე, ან საპროცესო ინსტიტუტთან კომბინაციაში ისახავდა სხვადასხვა მიზანს. მათ შორის კონკრეტულ სისხლის სამართლის საქმეზე სასურველი შედეგის მიღწევას, ქონების უკანონოდ ჩამორთმევას, პოლიტიკურ ანგარიშსწორებასა, შურისძიებას და სხვას.
მიმდინარეობდა ციხეში მყოფი პატიმრების შენიღბული და მიზანმიმართული განადგურება. რასაც მოწმობს ერთი მხრივ ის ფაქტი, რომ ციხეებში ყოველწლიურად ტუბერკულოზის 2 000-მდე ახალი შემთხვევა ფიქსირდებოდა და ჯანმრთელი და გადამდები დაავადების მონე პატიმრები ერთ საკანში იყვნენ განთავსებულები. ერთად განთავსების ეს დამკვიდრებული პრაქტიკა იყო ზოგჯერ მიზანმიმართულადაც ჯანმრთელი პატიმრის დათრგუნვის, ან მასზე შურისძიების მიზნით;
მეორე მხრივ, C ჰეპატიტის მკურნალობის ხელოვნურად შეფერხება, მეტიც, ამ დაავადების სკრინინგის აკრძალვა, რათა საზოგადოებისათვის დაფარული ყოფილიყო ციხეებში მისი ფართო გავრცელება, იქცა პრაქტიკად. პროკურატურა, როგორც წამყვანი სამართალდამცავი ორგანო, არამცთუ არ ასრულებდა მისთვის კანონით დაკისრებულ მოვალეობებს და არ ატარებდა სრულყოფილ და ობიექტურ გამოძიებას წამებისა და არაადამიანური მოპყრობის ფაქტებზე, პირდაპირ იყო ჩართული პატიმართა მიმართ ადამიანის უფლებების დარღვევაში;
დაუსჯელობის სინდრომი და მაღალი პოლიტიკური მხარდაჭერა სამართალდამცავ სტრუქტურებში ძალადობის მთავარი მამოძრავებელი ძალა იყო“,- განაცხადა თეა წულუკიანმა.