ეჭვგარეშეა, რომ ნიკა გვარამიას დაკავება განხორციელდა პოლიტიკური ნიშნით. როგორი შეკრულიც არ უნდა იყოს საქმე ფაქტობრივად თუ იურიდიულად, სასამართლო გადაწყვეტილება მხოლოდ მაშინ პასუხობს დემოკრატიული მართლმსაჯულების პრინციპს თუ ის არის როგორც კანონიერი, ისე პირველ რიგში, სამართლიანი, - ასე ეხმაურება ნიკა გვარამიას დაკავებას FirstNews.ge-თან საუბარში "ჭავჭავაძის ცენტრის" დირექტორი, საგარეო საქმეთა მინისტრის ყოფილი მოადგილე ნინო კალანდაძე.
მისივე თქმით, შერჩევითობა იურიდიულად ყველაზე მყარ საქმეს აქცევს პოლიტიკურ საქმედ.
"მიდგომა რომ შერჩევითია, ალბათ არავის ეპარება ეჭვი. კანონის უზენაესობის სტანდარტს რომ უყენებდნენ ყველას, მაშინ ივანიშვილით დაწყებული მისი ჩინოსნების 80 % ით დამთავრებული ახლა გაცილებით უფრო მასშტაბური დარღვევებით, გადაცდომებით და კრიმინალის ხარისხით უნდა ისხდნენ საპატიმროში. აშკარაა, რომ ეს არის მიზანმიმართული სელექციური მიდგომა.
რაში დასჭირდათ ეს, ამაზე პასუხი სპეკულაციური იქნება და არარელევანტური. ამით სააკაშვილის ფაქტორის განეიტრალება და ფოკუსის გადატანა უნდათ, სავაჭროდ დასჭირდათ დასავლეთთან თუ ევროინტეგრაციის შეფერხება სურთ, მეორე ხარისხოვანია, ვინაიდან ქვეყნის ცივილიზებულობის იმიჯს ეს ვნებს ქვეყნის გარეთ, ხოლო შიგნით ამყარებს განუკითხაობის შეგრძნებას. ერთ მშვენიერ დღეს ყველა მოქალაქე იქნება დაშინებული, დაზაფრული და სახელმწიფოსგან ანგარიშსწორების მოლოდინში, თითიდან გამოწოვილი საბაბით, როგორც ეს ტოტალიტარულ რეჟიმებს ახასიათებთ," -აღნიშნავს ჩვენთან საუბარში ნინო კალანდაძე.
კითხვაზე, რა უნდა გააკეთოს ახლა ოპოზიციამ, გვპასუხობს:
"ოპოზიცია ბევრ რამეს უნდა აკეთებდეს 2012 წლიდან მოყოლებული. მაგრამ, სამწუხაროდ, ვერ და არ აკეთებს. ოპოზიცია თამაშობს ბიძინას დაწერილი თამაშის წესებით ბიძინას კარზე. ამაში ოპოზიციის წარმომადგენლებს, ისევე როგორც ოპოზიციურ მედიას თავისი წვლილი აქვს.
მე არ მჯერა, რომ რუს ოლიგარქებს, კრიმინალებს და ეფესბეს მიერ კომპრომიტირებულ კლანებს დათმობით და ცივილიზებული საუბრით აჯობებ. მე მჯერა დიპლომატიის და დიპლომატიური ძალის, ანუ უპირატესობის ენის. ოპოზიციამ კი ყველა ბერკეტი ნებაყოფლობით დათმო. ასეთი ძალის და უპირატესობის დემონსტრირების საშუალება ოპოზიციას რეალურად ჰქონდა სულ 2- ჯერ - 2016-ში და 2020-ში. 2016 წელს, როცა ივანიშვილმა ხალხზე ზეწოლით, მანიპულაციით, მოსყიდვით, ძალის და კრიმინალის გამოყენებით იძალადა ამომრჩევლის ნებაზე, ხოლო ოპოზიციამ ეს არ არჩევნები უღიარა და შესაბამისად უკანონოდ მოპოვებული კონსტიტუციური ძალაუფლების კონსოლიდაცია დაუშვა - მას შემდეგ ივანიშვილმა ყველა საკვანძო რგოლი დაიქვემდებარა ტოტალურად, სამწუხაროდ პოლიტიკური უმცირესობაც. და 2020-ში, როცა აშკარა იყო, რომ საპარლამენტო ბოიკოტი და ოცნების რეჟიმის მარტო დატოვება ძალიან მტკივნეულ დარტყმას აყენებდა ოცნებას. ეს კარგად გამოჩნდა, როცა მედიატორთა მთელი წნეხი გადმოვიდა ოპოზიციაზე, რათა მათ შეეწყვიტათ ბოიკოტი. სხვა ზეწოლის ბერკეტი ოპოზიციას პრაქტიკულად აღარ ჰქონია. მათ შეეძლოთ 2021 ში მეორე ტურებზე უარის თქმით სააკაშვილის გათავისუფლება გამოევაჭრათ, ესეც კი არ ქნეს. შესაბამისად, ხვდებით ალბათ, რომ ახლაც სკეპტიკურად ვუყურებ ოპოზიციის შესაძლებლობებს.
გვარამიას მაშინ გამოუშვებს ივანიშვილი, თუ იგი ამაში პოლიტიკურ მიზანშეწონილობას დაინახავს და ამით თვითონ ხეირს ნახავს სანაცვლოდ. და არა იმიტომ, რომ მასზე ოპოზიციის ან საზოგადოების მღელვარება რამე გავლენას იქონიებს. ვიმეორებ, გავლენის მოსახდენად საჭიროა ძალა, ანუ იძულების ბერკეტი. ეს კი ოპოზიციას, დღეს, სამწუხაროდ არ აქვს,"- აცხადებს ნინო კალანდაძე ჩვენთან საუბარში.
შეგახსენებთ, რომ „მთავარი არხის“ დამფუძნებელი ნიკა გვარამია და მასთან ერთად ბრალდებული კახაბერ დამენია სასამართლომ დამნაშავედ ცნო, ზურაბ იაშვილი კი უდანაშაულოდ იქნა ცნობილი. ნიკა გვარამია სასამართლომ ნაწილობრივ დამნაშავედ ცნო, მის მიმართ წარდგენილი მუხლების ნაწილი 220-ე მუხლით გადაუკვალიფიცირა და მას სასჯელის სახით 3 წელი და 6 თვე განესაზღვრა.
სახალხო დამცველი ჰომოფობიასთან, ტრანსფობიასა და ბიფობიასთან ბრძოლის საერთაშორისო დღესთან დაკავშირებით განცხადებას ავრცელებს. სახალხო დამცველი კიდევ ერთხელ მოუწოდებს სახელმწიფო უწყებებს, ეფექტიანი პრევენციული რეაგირება მოახდინონ ლგბტ+ ადამიანების მიმართ ჩადენილ სავარაუდო დანაშაულებზე.
„17 მაისი ჰომოფობიასთან, ტრანსფობიასა და ბიფობიასთან ბრძოლის საერთაშორისო დღეა, რომლის მიზანს ძალადობის დაგმობა და ლგბტ+ ადამიანების მიმართ სოლიდარობის გამოხატვა წარმოადგენს. თუმცა, ლგბტ+ ადამიანები და მათი მხარდამჭერები ამ დღის საჯაროდ აღნიშვნას ძალადობის რისკების და სახელმწიფოს მხრიდან დაცვის გარანტიების არარსებობის გამო წლებია ვერ ახერხებენ.
განსაკუთრებით საგანგაშო იყო გასულ წელს „თბილისი პრაიდის“ კვირეულის ფარგლებში განვითარებული მოვლენები, როდესაც ულტრამემარჯვენე ჯგუფების ლიდერები და სხვა წევრები საზოგადოებას ლგბტ+ თემის წარმომადგენლებისა და მათი მხარდაჭერების მიმართ ძალადობისკენ პირდაპირ და საჯაროდ მოუწოდებდნენ. 2021 წლის 5 ივლისს, ღირსების მარშის დღეს, ამ ძალადობრივი ჯგუფების მიერ ჟურნალისტებსა და უფლებადამცველებზე ფართომასშტაბიანი თავდასხმა სამართალდამცავებმა ვერ აღკვეთეს, რის შედეგადაც არაერთი ადამიანი ფიზიკურად მძიმედ დაშავდა.
მიუხედავად იმისა, რომ წლების განმავლობაში გაიზარდა ლგბტ+ თემის ხილვადობა და შემცირდა საზოგადოებაში არსებული დისკრიმინაციული განწყობები, ამ პროცესს თან არ ახლავს სახელმწიფოს თანმიმდევრული და გააზრებული პოლიტიკა. უფრო მეტიც, სახელმწიფოს სამართლებრივი უმოქმედობა ახალისებს ლგბტ+ ადამიანების მიმართ უთანასწორობას საზოგადოებრივი ცხოვრების თითქმის ყველა სფეროში, ვერ აუმჯობესებს მათი ცხოვრების ხარისხს და დაუცველს ტოვებს მათ ძალადობისა და დისკრიმინაციის პირისპირ.
მნიშვნელოვან გამოწვევას წარმოადგენს სიძულვილის ნიადაგზე ჩადენილი დანაშაულების დროული, ეფექტიანი და ანგარიშვალდებული გამოძიების საკითხი. სახელმწიფოს დღემდე არ აქვს შექმნილი სიძულვილის მოტივით ჩადენილ დანაშაულებთან ბრძოლის ერთიანი სტრატეგია და ჰომო/ტრანსფობიურ დანაშაულებზე სახელმწიფოს რეაგირება ჯერ კიდევ ვერ აკმაყოფილებს ეფექტიანობის, დროულობისა და მიუკერძოებლობის სტანდარტებს.
სახალხო დამცველი კიდევ ერთხელ მოუწოდებს შესაბამის სახელმწიფო უწყებებს და საჯარო პირებს, ეფექტიანი პრევენციული და რეაქტიული რეაგირება მოახდინონ ლგბტ+ ადამიანების მიმართ ჩადენილ სავარაუდო დანაშაულებზე და გააკეთონ საჯარო განცხადებები, რაც საზოგადოებაში თანასწორობის შესახებ ცნობიერების ამაღლებას შეუწყობს ხელს“, - სახალხო დამცველის განაცხადებაში.
სახალხო დამცველი ნინო ლომჯარია რუსთავის მე-12 პენიტენციურ დაწესებულებაში „მთავარი არხის“ გენერალური დირექტორის, ნიკა გვარამიას მოსანახულებლად მივიდა.
როგორც ლომჯარიამ პენიტენციურ დაწესებულებაში შესვლამდე განაცხადა, საქმე, რომელზეც ნიკა გვარამიას მიმართ გამამტყუნებელი განაჩენი დადგა, დანაშაულის ნიშნებს საერთოდ არ შეიცავს.
„ჩემი მოსვლის მიზანი არის ის, რომ მოვინახულო პატიმარი, რომლის მიმართაც სახალხო დამცველის შეფასებით, დღეს კანონთან შეუსაბამო განაჩენი დადგა. სახალხო დამცველის აპარატს ბრალი, სადაც განაჩენი დადგა, დეტალურად გვაქვს შესწავლილი. ვფიქრობთ, ამ საქმეში არათუ სისხლის სამართლის დანაშაულის ნიშნებია, არამედ არც საკორპორაციო სამართლის მიმართულებით შეიძლებოდა ჰქონოდა მსგავს დავას წარმატება მომჩივნის მხრიდან. ამიტომ ვფიქრობ, დარღვეულია კანონიერების პრინციპი, ასევე სტრასბურგის ევროკონვენციის მეშვიდე მუხლი, რომელიც ამბობს, რომ არ შეიძლება ადამიანი გასამართლდეს ისეთი ქმედებისთვის, რაც დანაშაულად არ ითვლება. ვფიქრობთ, აღნიშნულ განაჩენთან დაკავშირებით დანაშაულის ნიშნები არ არსებობდა“,- განაცხადა ნინო ლომჯარიამ.
კითხვაზე, რა არის ნიკა გვარამიას მიმართ გამამტყუნებელი განაჩენის გამოტანის მიზანი, ლომჯარია ამბობს, რომ ეს პროცესი „კრიტიკული და ხელისუფლებისგან დამოუკიდებელი მედიასაშუალებების მიმართ დაწყებული მტრული გარემოს გაგრძელება და რადიკალური გამოვლინებაა“.
„ვხედავდით არაერთ სისხლის სამართლის საქმეს მედია მფლობელების და მენეჯერების მიმართ, ფიზიკურ თავდასხმებს და დისკრედიტაციების მცდელობებს, დღეს კი ალბათ კულმინაციური მომენტია, როდესაც ყველაზე კრიტიკული მედიასაშუალების მენეჯერს სასამართლომ გამოუტანა გამამტყუნებელი განაჩენი იმისთვის, რაც დანაშაულს საერთოდ არ წარმოადგენს. ვფიქრობ, ეს ყველაფერი ემსახურება იმას, რომ კრიტიკულ მედიასაშუალებებზე განხორციელდეს ისეთი ზეწოლა, რაც დემოკრატიულ სახელმწიფოებში არ ხდება. ასეთი ფაქტები ხდება ავტორიტარულ ქვეყნებში. დღევანდელი გადაწყვეტილებით ვთქვით, რომ ვცხოვრობთ არა დემოკრატიაში, სადაც მნიშვნელოვანია მედიის თავისუფლება, არამედ ავტორიტარულ ქვეყანაში“, - განაცხადა ნინო ლომჯარიამ.
მისივე თქმით, სახალხო დამცველის აპარატი გვარამიას მიმართ განაჩენის შესახებ საკუთარ სამართლებრივ შეფასებას საერთაშორისო პარტნიორებს გააცნობს.
„ვაპირებთ ჩვენი მანდატის ფარგლებში დეტალურად გავეცნოთ განაჩენს. აუცილებლად გვექნება დამატებითი სამართლებრივი შეფასებები, რასაც საერთაშორისო ორგანიზაციებს მივაწოდებთ. ვფიქრობ, ამ საქმეს საერთაშორისო სასამართლოებში წარმატება ექნება, თუმცა ეს გრძელვადიანი პერსპექტივაა“,- განაცხადა ნინო ლომჯარიამ „მთავარ არხთან“ საუბრისას.
ცნობისათვის, „მთავარი არხის“ დამფუძნებელი ნიკა გვარამია, რომელიც სასამართლომ დამნაშავედ ცნო, სხდომათა დარბაზშივე დააკავეს. თბილისის საქალაქო სასამართლოს მოსამართლემ, ლაშა ჩხიკვაძემ ნიკა გვარამია ნაწილობრივ დამნაშავედ ცნო, მის მიმართ წარდგენილი მუხლების ნაწილი 220-ე მუხლით გადაკვალიფიცირდა და მას სასჯელის სახით 3 წელი და 6 თვე განესაზღვრა.
საკმარისზე მეტი მარაგი არსებობს ფქვილის, ხორბლის მარაგიც არსებობს ქვეყანაში და სულ რაღაც ერთ თვეში, თვე-ნახევარში უკვე ჩვენც საკუთარ ხორბალს, მოსავალს ავიღებთ.
ვიდრე ეს პროცესი უკიდურესად დიდ ზიანს არ მიაყენებს ქვეყნის ევროატლანტიკურ მისწრაფებებს, სალომე ზურაბიშვილმა დაუყოვნებლივ უნდა შეიწყალოს ნიკა გვარამია, - ამის შესახებ „ნაციონალური მოძრაობის“ ერთ-ერთმა ლიდერმა, რომან გოცირიძემ თბილისის საქალაქო სასამართლოში განაცხადა.
უკრაინის ქალაქ იზიუმთან კიდევ ერთი ქართველი მებრძოლი, რატი შურღაია დაიღუპა.ოჯახის ახლობლების ინფორმაციით, შურღაიამ ერთ-ერთი ბრძოლის დროს მძიმე დაზიანებები მიიღო და კანტუზია განუვითარდა, მაგრამ მკურნალობის კურსი ბოლომდე არ ჩაუტარებია და საომარ მოქმედებებში მონაწილეობის მიღება გააგრძელა, რის გამოც მდგომარეობის გართულების შემდეგ, ექიმებმა მისი გადარჩენა ვერ შეძლეს.
