„147 შემთხვევიდან 18 წლამდე ასაკის 14 მოზარდია, სტაციონარში მოთავსდა ხუთი, მაგრამ მოთავსების მიზეზი „ომიკრონი“ იყო მხოლოდ ორ შემთხვევაში, დანარჩენში მიზეზი იყო „კოვიდის“ თანმხლები დაავადებები. 147 პაციენტის კლინიკური მდგომარეობა შედარებით მსუბუქია – მიმდინარეობს ზომიერი ტემპერატურით, ყელის ტკივილით და ხველებით, სუნთქვის უკმარისობა და ინტენსიური თერაპიის საჭიროება არ არის“, – განაცხადა ამირან გამყრელიძემ.

დაავადებათა კონტროლის ეროვნული ცენტრის ხელმძღვანელი მოქალაქეებს მოუწოდებს, ბუსტერ-დოზებით აიცრან.

„147 დადასტურებული შემთხვევიდან 16% კოვიდგადატანილია. ასევე, საკმაოდ აქტიურად ემართებათ სრულად აცრილებს, ამ შემთხვევების 60% აცრილებში გვაქვს. ამიტომ „ომიკრონის“ გავრცელების შესაკავებლად ბუსტერიზაცია არის მთავარი რეკომენდაცია. რაც მეტი ბუსტერი გაკეთდება ქვეყანაში, მით ნაკლები იქნება შემთხვევების რაოდენობა და უფრო მსუბუქი. ამიტომ ჩვენ რაც შეიძლება სწრაფად უნდა ავცრათ მოსახლეობა. ნუ გავთამამდებით იმით, რომ „ომიკრონი“ შედარებით მსუბუქია და კვალს არ დატოვებს, არა – კვალი აუცილებლად დარჩება. ამიტომ სამჯერადი ვაქცინაცია სერიოზულად დაგვიცავს „ომიკრონისგან“. ასევე, მნიშვნელოვანია ყველა სივრცეში პირბადის ტარება, დისტანცია და თავშეყრისგან თავის არიდება. დეკემბერში, როცა პირველი შემთხვევა დაფიქსირდა, ყველა საეჭვო შემთხვევიდან „ომიკრონი“ ამოდიოდა 2-3 შემთხვევაში, დეკემბრის ბოლო კვირაში ეს მაჩვენებელი გახდა 50%. ასე რომ, ზრდა საკმაოდ სერიოზულია და ვფიქრობთ, დაახლოებით 2-3 კვირის განმავლობაში ის უკვე იქნება დომინანტი შტამი.

მსოფლიოს რომ გადავხედოთ, ბოლო ერთი კვირის განმავლობაში მსოფლიოში შემთხვევათა რაოდენობა მილიონს აჭარბებს. ასეთი სტატისტიკა სხვა შტამების დროს არ ყოფილა – მაქსიმუმი იყო 900 ათასამდე, მაგრამ აღსანიშნია ისიც, რომ არ იმატებს სიკვდილიანობა. პირიქით – სიკვდილიანობის შემცირების ტენდენცია თანდათანობით გრძელდება. თუმცა, ერთდროულად შემთხვევების დიდი რაოდენობა თუ იქნება, შეიძლება მოხდეს როგორც ამბულატორიული, ისე სტაციონარული სექტორის გადატვირთვა, მაგრამ ჯერ უნდა დავაკვირდეთ. ჯერჯერობით 4 ათასზე ოდნავ მეტი ადამიანია სტაციონარში და კიდევ ერთი ამდენის რესურსი აქვს ქვეყანას. ჩემი აზრით, „ომიკრონის“ მართვა ძირითადად იქნება ონლაინ-კლინიკების, ამბულატორიებისა და პოლიკლინიკების პასუხისმგებლობა, რადგან „ომიკრონი“ შედარებით მსუბუქად მიმდინარეობს, ვიდრე დელტა-შტამი“, – აღნიშნა ამირან გამყრელიძემ.

გამყრელიძის თქმით, საახალწლო პერიოდში მობილობა სერიოზულად არის გაზრდილი და ბევრი ღონისძიება ჩატარდა – ზოგიერთ ადგილას რეგულაციების დაცვით, ზოგიერთ შემთხვევაში კი რეგულაციები ნაკლებად იყო დაცული.

„პირველი ორი კვირა მოგვცემს სერიოზულ ინფორმაციას, რა უნდა გამკაცრდეს და გამკაცრდეს თუ არა. ჩვენ წელს, მომავალ 6 თვეში გაცილებით მეტი ადამიანი უნდა ავცრათ, ვიდრე ავცერით. ეს მიზანი ძალაშია, რადგან აცრების გარეშე პანდემიას ვერ დავამარცხებთ“, – განაცხადა გამყრელიძემ.