ნეპალის ეროვნული კატასტროფების რისკის შემცირებისა და მართვის სააგენტოს ცნობით, წვიმასთან დაკავშირებულ ინციდენტებს სულ მცირე, 46 ადამიანი ემსხვერპლა, ხოლო ექვსი ადამიანი დაკარგულად ითვლება.

ნეპალის შინაგან საქმეთა სამინისტროს ცნობით, სტიქიური მოვლენები ყველაზე მძიმე იყო ევერესტის მთის სამხრეთ კალთებზე და მიმდებარე მთიან რაიონებში, სადაც ძლიერი ნალექის შედეგად მდინარეები კალაპოტიდან გადავიდა, ხოლო რამდენიმე სოფელი მთლიანად დაიტბორა.

მედიის ცნობით, არსებობს გაფრთხილებები, რომ დაღუპულთა რიცხვი შესაძლოა გაიზარდოს, რადგან ოფიციალური პირები დაკარგული ადამიანების პოვნას ცდილობენ.

როგორც მედია იუწყება, ძლიერი წვიმა დაზარალებულ სოფლებამდე მისვლას აფერხებს, რადგან ბევრი გზა წაღებულია.

სამაშველო ოპერაციები გრძელდება, თუმცა ზოგიერთ რეგიონში გადაადგილება შეფერხებულია გზების დაზიანებისა და მეწყრული საფრთხის გამო. ხელისუფლება მოსახლეობას მოუწოდებს, მოერიდონ მაღალი რისკის ზონებს და დაიცვან საგანგებო წესები.

ქარიშხალი მაშინ დაიწყო, როდესაც ასობით ათასი ადამიანი დაშაინის, ჰიმალაის ქვეყანაში ყველაზე დიდი ფესტივალის აღნიშვნის შემდეგ კატმანდუში ბრუნდებოდა.

როგორც უცხოური მედია აღნიშნავს, მუსონური წვიმები, რომლებიც ძირითადად ივნისიდან სექტემბრამდე გრძელდება, სამხრეთ აზიაში ყოველწლიურად მასობრივ სიკვდილსა და ნგრევას იწვევს, თუმცა ბოლო წლებში ფატალური წყალდიდობებისა და მეწყერების რიცხვი გაიზარდა.