ამის შესახებ უცხოური მედია იუწყება.

გავრცელებული ინფორმაციით, 10 სექტემბერს ჩინეთი მასწავლებლის დღეს აღნიშნავდა. ათი წლის მოსწავლე გოგონა სკოლაში ყვავილებით მივიდა და მათემატიკის მასწავლებელს დღესასწაული მიულოცა. მათემატიკის გაკვეთილის მიმდინარეობისას გოგონამ ორ შეკითხვას ვერ უპასუხა, რის გამოც მასწავლებელმა ის მუხლებზე დააყენა, შემდეგ კი ყური აუწია და თავში რტყმა დაუწყო.

გოგონას ტყუპმა დამ ჟურნალისტებთან საუბრისას აღნიშნა, რომ მისმა ნაცემმა ტყუპისცალმა დამოუკიდებლად წამოდგომა ვერ შეძლო. საკუთარ მერხთან დაბრუნებაში მას მოსწავლეები დაეხმარნენ. დაახლოებით სამი საათის შემდეგ მასწავლებელმა გოგონას ბებიას დაურეკა და მოსწავლის ავადმყოფური შესახედაობის გამო მისი სკოლიდან წაყვანა მოითხოვა. სკოლაში მისულმა ბებიამ შენიშნა, რომ მის შვილიშვილს ლაპარაკი და თვალების გახელა არ შეეძლო. გოგონა საავადმყოფოში გადაიყვანეს, თუმცა ექიმებმა მისი გადარჩენა ვერ მოახერხეს.

ბებიამ ჟურნალისტებთან საუბრისას აღნიშნა, რომ გოგონას მათემატიკის გაკვეთილზე დასწრების ყოველთვის ეშინოდა, ვინაიდან მასწავლებელი ფიზიკურ დასჯას ხშირად მიმართავდა.

სამართალდამცავებმა მასწავლებელი და სკოლის დირექტორი დააკავეს. ამ დროისათვის, მომხდარზე გამოძიება კვლავ მიმდინარეობს.