„მიხეილ სააკაშვილის დაბრუნება პოლიტიკური ფრონტის წინა ხაზზე მნიშვნელოვან მოვლენას წარმოადგენს - იმის გათვალისწინებით, თუ როგორი  შთამბეჭდავი იყო მისი კავშირების გაწყვეტა ვლადიმერ ზელენსკის წინამორბედ პეტრო პოროშენკოსთან.

ქართველი პოლიტიკოსი უკრაინელ პოლიტიკოსად მას შემდეგ გადაიქცა, როცა მისი მოწინააღმდეგეები თბილისში ხელისუფლებაში მოვიდნენ და მიხეილ სააკაშვილს კორუფციაში ბრალდებები წაუყენეს. 2015 წელს მან პრეზიდენტ პეტრო პოროშენკოსაგან უკრაინის მოქალაქეობა მიიღო და შავიზღვისპირა რეგიონის - ოდესის ოლქის გუბერნატორად დაინიშნა. მოგვიანებით ორი ძველი ნაცნობ-მეგობარი ერთმანეთს მტრულად გადაეკიდნენ. გამწვავებული დაპირისპირების შემდეგ პრეზიდენტმა მიხეილ სააკაშვილს უკრაინის პასპორტი გაუუქმა და ქვეყნიდან მისი დეპორტაცია განახორციელა.

2019 წელს არჩეულმა უკრაინის ახალმა პრეზიდენტმა ვლადიმერ ზელენსკიმ მიხეილ სააკაშვილს უკრაინის მოქალაქეობა დაუბრუნა. თავდაპირველად ვლადიმერ ზელენსკის საქართველოს ექს-პრეზიდენტის უკრაინის ვიცე-პრემიერად დანიშვნა სურდა, ცდილობდა ვერხოვნა რადაში საკუთარი პარტიის „ხალხის მსახურის“ მხარდაჭერრა მოეპოვებინა, მაგრამ ამაოდ. ბევრამ დეპუტატმა ჩათვალა, რომ მიხეილ სააკაშვილი ზედმეტად კონფრონტაციული იქნება და საბოლოო ჯამში, ძველებურად პრეზიდენტს დაუპირისპირდებაო.

თუ მიხეილ სააკაშვილი ვიცე-პრემიერი გახდებოდა, მისი თქმით, იგი საერთაშორისო სავალუტო ფონდთან და სხვა საფინანსო ინსტიტუტებთან მჭიდრო ურთიერთობას განავითარებდა უკრაინის ეკონომიკის სასარგებლოდ.

უკრაინის ბიზნეს-საზოგადოება თავდაპირველად შეშფოთებული იყო ისეთი პოლიტიკოსის დაბრუნებით, რომელსაც რეფორმების გატარების გამოცდილება კი ჰქონდა, მაგრამ პოლიტიკურ მოკავშირეებთან დაპირისპირებითაც იყო ცნობილი. თუმცა მაინც დიდი იმედები არსებობდა იმისა, რომ მიხეილ სააკაშვილი რეფორმების განხორციელებას დააჩქარებდა, მცირე და საშუალო ბიზნესს კრედიტების აღებას გაუადვილებდა და ოლიგარქებს გვერდზე გასწევდა. ბიზნეს-საზოგადოებამ მხარი დაუჭირა მიხეილ სააკაშვილის მოწოდებას მიმდინარე წელს საერთაშორისო სავალუტო ფონდისაგან დაფინანსების გაზრდას. იგი კრიზისიდან გამოსვლაში უმთავრეს როლს გადასახადების დაკლებას ანიჭებდა:

„გაგახსენებთ, რომ საქართველოში ჩვენ გადასახადები 62%-ით შევამცირეთ, სამაგიეროდ ეკონომიკის მოცულობა უპრეცედენტოდ - ოთხჯერ გაიზარდა... თუ საშუალო უკრაინელი რეფორმის პოზიტიურ გავლენას ვერ იგრძნობს, თუ მისი პირადი კეთილდღეობა არ გაუმჯობესდება, მაშინ ასეთი რეფორმა რეფორმა არ არის“, - ამბობდა მიხეილ სააკაშვილი“.

მოამზადა სიმონ კილაძემ

წყარო: https://www.ft.com/content/8f163cc5-b7fe-4c78-b143-46c23a23048d