რუსეთის პრეზიდენტმა ვლადიმირ პუტინმა დაუშვა აშშ-ის, ამერიკის მოქალაქეების, რეზიდენტების, უპირატესად ამერიკის ბაზარზე მომუშავე კომპანიებისა და მათი კუთვნილი კომპანიების ქონების კონფისკაცია რუსული აქტივების კომპენსაციისთვის. შესაბამისი ბრძანებულება ხუთშაბათს გამოქვეყნდა.
თეთრმა სახლმა 21 მაისს განაცხადა, რომ შეისწავლის ცნობას იმის შესახებ, რომ ისრაელმა აღჭურვილობა ჩამოართვა The Associated Press-ს. მან ინციდენტს "შემაშფოთებელი" უწოდა.
პალესტინას სახელმწიფოდ აღიარებს გაეროს წევრი კიდევ სამი ქვეყანა: ესპანეთი, ნორვეგია და ირლანდია. გადაწყვეტილება ძალაში ოფიციალურად 28 მაისიდან შევა.
რუსეთმა უკრაინაზე უპილოტო საფრენი აპარატებით მორიგი იერიში მიიტანა. უკრაინის საჰაერო ძალების მიერ დილით გამოქვეყნებული მონაცემებით, ღამის განმავლობაში საოკუპაციო ძალებმა „შაჰედის“ ტიპის 29 დრონი გამოიყენეს. საჰაერო ძალების თანახმად, ოდესის, ნიკოლაევის, დნეპროპეტროვსკის, ხარკოვის, ჩერკასის, ხერსონისა და კიროვოგრადის ოლქებში 28 უპილოტო საფრენი აპარატი ჩამოაგდეს.
უკრაინის პრეზიდენტმა ვოლოდიმირ ზელენსკიმ განაცხადა, რომ რთული სიტუაციის მიუხედავად, დონეცკის და ხარკოვის მიმართულებებით კონტროლს ინარჩუნებენ. გასულ ღამით, თავდაცვის ძალების მთავარსარდალთან საუბრის შემდეგ, ზელენსკიმ უკრაინელებისადმი ვიდეომიმართვაში თქვა, რომ რუსეთი აქტიურად იყენებს მართვად საავიაციო ბომბებს, რაც ისევ და ისევ აჩვენებს, რომ უკრაინას სჭირდება საჰაერო თავდაცვის დამატებითი სისტემები და სამხედროების გადასვლა ახალ საბრძოლო თვითმფრინავებზე.
პოლონეთში დაკავებულია ცხრა პირი, რომლებიც ეჭვმიტანილი არიან საბოტაჟსა და დივერსიაში რუსეთის სპეცსამსახურების დაკვეთით. ამის შესახებ პოლონეთის პრემიერ-მინისტრმა დონალდ ტუსკმა განუცხადა ტელეკომპანია TVN24-ს.
